गोसाईकुण्ड- गोसाईकुण्ड गाउँपालिकाले पालिकाभित्रका ५ वटा विद्यालयलाई निःशुल्क ल्यापटप वितरण गरेको छ। सूचना प्रविधिको विकास र डिजिटल सिकाईलाई प्रवर्द्धन गर्ने उद्देश्यका साथ “एक विद्यालय, एक ल्यापटप” कार्यक्रम सुरु गरेको हो ।
आर्थिक वर्ष २०८२/८३ को वार्षिक स्वीकृत कार्यक्रम अन्तर्गत मिति २०८३ साल असार १९ गते गाउँपालिकाले पहिलो चरणमा पाइलटिङ (परीक्षण) को रूपमा पालिकाभित्रका धेरै विद्यार्थी संख्या भएका विद्यालयलाई निःशुल्क ल्यापटप वितरण गरेको हो।
गाउँपालिकाका अध्यक्ष कैसाङ नुर्पु तामाङ, उपाध्यक्ष प्रतिमा तामाङ र प्रमुख प्रशासकीय अधिकृत सुरेश भट्टराईको विशेष उपस्थितिमा आयोजित एक कार्यक्रमका बीच विद्यालयका प्रतिनिधिहरूलाई ल्यापटप हस्तान्तरण गरिएको हो।
गोसाइँकुण्ड गाउँपालिका अन्तरगत रहेको विद्यालयहरु कोमिन श्यामेवाङफेल माध्यमिक विद्यालय स्याफ्रुवेशी ,रसुवा माध्यमिक विद्यालय धुन्चे, सरस्वती आधारभूत विद्यालय, भीमसेन आधारभूत विद्यालय र नेपाल राष्ट्रिय आधारभूत विद्यालय, टिमुरे लगायत पाँच विद्यालयलाइ ल्यापटप वितरण गरिएको थियो ।
कार्यक्रममा बोल्दै गाउँपालिकाका अध्यक्ष कैसाङ नुर्पु तामाङले आधुनिक शिक्षामा प्रविधिको भूमिका महत्त्वपूर्ण रहेको र यो कार्यक्रमले विद्यालयहरूको प्रशासनिक एवं शैक्षिक गतिविधिमा टेवा पुग्ने विश्वास व्यक्त गर्नुभयो।गत एसइइमा सर्बोकृस्ट नतिजा निकाल्न सफल पालिकाले नतिजालाइ निरन्तरता दिन शिक्षक्षेत्रमा सुधारका कार्यक्रमहरु गर्दै आयको छ
त्यस्तै, उपाध्यक्ष प्रतिमा तामाङ र प्रमुख प्रशासकीय अधिकृत सुरेश भट्टराईले आगामी दिनमा यस कार्यक्रमको प्रभावकारिता हेरेर अन्य विद्यालयहरूमा पनि बिस्तार गर्दै लैजाने योजना रहेको जानकारी दिनुभयो।
वितरण कार्यक्रममा गाउँपालिकाका जनप्रतिनिधि, कर्मचारी, विभिन्न विद्यालयका प्रधानाध्यापक तथा शिक्षकहरूको उपस्थिति रहेको थियो। प्रविधिको युगमा गाउँपालिकाले चालेको यस कदमलाई स्थानीयस्तरमा सकारात्मक रूपमा हेरिएको छ।
